الوزير المتفشي في أحلام حنّاوة..
فـ "والو" بلاد العجايب.. عاشت امرأه اسمها عايشه بنت الطالب، ومرت الساعات وليام والسنين.. وجابت طفل زين، سماته حناوه.حطته فـ الجحفة.. وعرضت جاراتها وبدات تغني:"حناوه عنبر وندْ/ حناوه ما جابو حدْ/ حناوه مثرد بـ حروره/ حناوه زايد بـ طيوره". غنات وشطحت وبردت قلبها.
دخل حناوة للمدرسة وتعلم القراية.. وقرر يرفع فـ بلاده الرايه.. كبر وصار حكيم.. كل كلامه من الكتاب، وتفوق فـ الدين والأدب والحساب.
... ...
وفـ يوم من الايام تلاقات السبايب.. وتفشات لمراض فـ "والو" بلاد العجايب. وقرر حناوه يعيش.. يقاوم الخوف والاحزان.. يقاوم الموت والنسيان.. مشى مع ناس آمنوا بفكره.. غرسوا شجره.. شجرة حياة.. وبعد سنين جات.. جات الثمره.
تزوج حناوه بعروسه حنينه.. قلبها كبير.. عاقلة ورزينه.. ضوّات بيته بطفلة زينة.. سماها "بها المدينه".. فرح بيها وتهنى وبقى يتمنى.. تجيه فرصة ويرد حياتها جنه.
... ...
كبرت "بها المدينة" قدام عينيه.. وكان حلمها الأكبر.. تعيش فـ مكان أخضر..
راح حناوه للسلطان.. وطلب أرض يزرعها قمح وخوخ ورمان..
السلطان رحب بيه.. شد على يديه... وقال له:"انت راجل حق.. تستاهل وتستحق".. وبعثه فـ الحين لوزير الفلاحة... اللي استقبله ورفعه على كفوف الراحة.. واستلم منه الملف.. وقال له بعد ما دار ولف: "سير بشّر الأهل والأحباب.. فـ يومين ناتيك بلجواب..."..
... ...
حناوه استنى يومين.. كل يوم فيه اثناعش شهر.. وكل شهر يزيد شيبه فـ لعمر..
طالت المدة وما تحقّقش الوعد .. لكن غصن بنته تفتح وتمد.. وهذا اللي طيب جرحو... وقالت جماعة معاه: "للوزير نروحو"..
استقبلهم كاتب الوزير.. وشرح لهم سبب التأخير: "يا جماعة الخير.. احنا وانتم.. كيف كيف فـ الهم.. تعرضنا لنهب وتزوير.. اعذرونا.. وما ستر الله استروه.. مشروع الامتياز انسوه.. مجموعة خاينة لعبت على الكاينة.. أرضكم فـ الخريطة باينة.. روحوا اسعوها.. احرثوا وازرعوها.. واذا بغيتوا بيعوها"..
بقى المشكل قايم.. و"بها المدينة" تزوجت وفـ قلبها حلم صايم.. وجابت طفل سماته حناوه الصغير.. وقالت له: "ورا حلم جد جدك سير"..
... ...
فـ يوم من ليام عيط البراح.. وخبّر وصاح.. وكان فـ صوته بحه: "الوزير نقلوه لقطاع الصحة".
... ...
راح حناوه للسلطان، وطلب يعاونوه باش يداوي.. من لهبال والزهايمر والكلاوي..
السلطان رحب بيه.. شد على يديه... وقال له :"انت راجل حق.. تستاهل وتستحق".. وبعثه فـ الحين لوزير الصحه.. اللي استقبله ورفعه على كفوف الراحه.. واستلم منه الملف.. وقال له بعد ما دار ولف: "سير بشّر الأهل والأحباب.. فـ يومين ناتيك بلجواب..."..
-------------
بقلم : علي مغازي/ شاعر وكاتب جزائري
دخل حناوة للمدرسة وتعلم القراية.. وقرر يرفع فـ بلاده الرايه.. كبر وصار حكيم.. كل كلامه من الكتاب، وتفوق فـ الدين والأدب والحساب.
... ...
وفـ يوم من الايام تلاقات السبايب.. وتفشات لمراض فـ "والو" بلاد العجايب. وقرر حناوه يعيش.. يقاوم الخوف والاحزان.. يقاوم الموت والنسيان.. مشى مع ناس آمنوا بفكره.. غرسوا شجره.. شجرة حياة.. وبعد سنين جات.. جات الثمره.
تزوج حناوه بعروسه حنينه.. قلبها كبير.. عاقلة ورزينه.. ضوّات بيته بطفلة زينة.. سماها "بها المدينه".. فرح بيها وتهنى وبقى يتمنى.. تجيه فرصة ويرد حياتها جنه.
... ...
كبرت "بها المدينة" قدام عينيه.. وكان حلمها الأكبر.. تعيش فـ مكان أخضر..
راح حناوه للسلطان.. وطلب أرض يزرعها قمح وخوخ ورمان..
السلطان رحب بيه.. شد على يديه... وقال له:"انت راجل حق.. تستاهل وتستحق".. وبعثه فـ الحين لوزير الفلاحة... اللي استقبله ورفعه على كفوف الراحة.. واستلم منه الملف.. وقال له بعد ما دار ولف: "سير بشّر الأهل والأحباب.. فـ يومين ناتيك بلجواب..."..
... ...
حناوه استنى يومين.. كل يوم فيه اثناعش شهر.. وكل شهر يزيد شيبه فـ لعمر..
طالت المدة وما تحقّقش الوعد .. لكن غصن بنته تفتح وتمد.. وهذا اللي طيب جرحو... وقالت جماعة معاه: "للوزير نروحو"..
استقبلهم كاتب الوزير.. وشرح لهم سبب التأخير: "يا جماعة الخير.. احنا وانتم.. كيف كيف فـ الهم.. تعرضنا لنهب وتزوير.. اعذرونا.. وما ستر الله استروه.. مشروع الامتياز انسوه.. مجموعة خاينة لعبت على الكاينة.. أرضكم فـ الخريطة باينة.. روحوا اسعوها.. احرثوا وازرعوها.. واذا بغيتوا بيعوها"..
بقى المشكل قايم.. و"بها المدينة" تزوجت وفـ قلبها حلم صايم.. وجابت طفل سماته حناوه الصغير.. وقالت له: "ورا حلم جد جدك سير"..
... ...
فـ يوم من ليام عيط البراح.. وخبّر وصاح.. وكان فـ صوته بحه: "الوزير نقلوه لقطاع الصحة".
... ...
راح حناوه للسلطان، وطلب يعاونوه باش يداوي.. من لهبال والزهايمر والكلاوي..
السلطان رحب بيه.. شد على يديه... وقال له :"انت راجل حق.. تستاهل وتستحق".. وبعثه فـ الحين لوزير الصحه.. اللي استقبله ورفعه على كفوف الراحه.. واستلم منه الملف.. وقال له بعد ما دار ولف: "سير بشّر الأهل والأحباب.. فـ يومين ناتيك بلجواب..."..
-------------
بقلم : علي مغازي/ شاعر وكاتب جزائري